قصيدة من مغترب إلى أمه ( باللهجة الخليجية )

بسم الله الرحمن الرحيم



يايمه إنتي غلاكِ يسير في دمّي
أنا مقصر بحقك يانظر عيني

منك التمس وارتجي شمّ العذر شمّي
في مبتدا العمر ولاّ بآخر سنيني

عسى الشمل معك بأسرع وقت يلتمي
وأشوف من شوفها شوف يسلّيني

على فراقك مليت بدمعتي كمّي
والهم مابين يوم ويوم يكويني

الضيق خالي وأبوي وجدّي وعمّي
من حيث مارحت يجري في شراييني

شوفك عن القلب يبعد داعي الهمِّ
ثوبٍ عن الهمِ والأحزانِ يكسيني

أبعث رسالة عذرْ ينطق بها فمّي
حبر الرساله يايمه دمعة العينِ

تدللي آمري يالغاليه سمّي
عساك عن ماضي الهجران تعفيني

ودي بشوفك وأضمك بالصدر ضمّي
وأكفّر اللي مضى من ماضي سنيني